Mae Trampers yn sgwteri symudedd sydd wedi eu dylunio’n bwrpasol ar gyfer tirweddau anwastad. Gallant gael eu defnyddio gan bobl sydd ag anawsterau cerdded oherwydd nam symudedd i gyrraedd rhai o leoedd mwyaf arbennig y Parc Cenedlaethol.
Mae Awdurdod y Parc Cenedlaethol yn gweithio’n gyson i wneud Eryri yn le hygyrch i bawb ac wedi datblygu cyfres o lwybrau Tramper-gyfeillgar ar hyd a lled y Parc Cenedlaethol. O leoliadau glan llyn heddychlon i olygfannau anhygoel yn y bryniau, mae llwybrau Tramper-gyfeillgar Eryri yn cynnig cyfoeth o ardaloedd i’w mwynhau.
Mae Awdurdod Parc Cenedlaethol Eryri yn cynnig llogi Tramper i bobl sydd ag anawsterau cerdded.
Mae llogi Tramper drwy Awdurdod Parc Cenedlaethol Eryri am ddim.
Rhaid archebu’r Tramper o leiaf 4 wythnos ymlaen llaw, os gwelwch yn dda.
Rydym yn croesawu rhoddion gwirfoddol i helpu i gynnal a chefnogi ein Trampers yma.
Sgwter symudedd sydd wedi ei ddylunio’n bwrpasol ar gyfer tirwedd anwastad, mwdlyd neu laswelltog yw’r Tramper. Mae’n gerbyd cryf a chadarn sydd yn hawdd i’w ddefnyddio ac yn gyfforddus ar deithiau anwastad. Mae’n caniatau pobl sydd â nam symudedd i fwynhau’r awyr agored ac i ymuno â theulu a ffrindiau ar deithiau cerdded.
Mae’r Tramper yn gerbyd hawdd i’w ddefnyddio sydd yn debyg iawn i sgwter symudedd confensiynol. Pan y byddwch yn llogi Tramper gan Awdurdod Parc Cenedlaethol Eryri, byddwch yn derbyn sesiwn anwytho, cyfarwyddiadau diogelwch yn ogystal â chael cyfle i brofi’r Tramper dros eich hunain cyn i chi gychwyn eich taith.
Mae’r Tramper ar gael i unrhyw un sydd ag anawsterau cerdded oherwydd nam symudedd.
Mae gan Awdurdod Parc Cenedlaethol Eryri gyfres o lwybrau sydd wedi eu datblygu i fod yn Tramper-gyfeillgar. Mae’r llwybrau hyn i’w gweld ar dudalen Llwybrau a Theithiau y wefan hon ac wedi eu nodi o dan y categori ‘Tramper gyfeillgar’. Mae manylion am sut i logi tramper yn cael eu nodi ar dudalen y llwybr.
Mae llogi Tramper drwy Awdurdod Parc Cenedlaethol Eryri yn rhad ac am ddim. Croesawir cyfraniadau i’r Awdurdod.
Rhoi Rhodd