Mae tîm o Wardeiniaid yn cadw golwg ar Barc Cenedlaethol Eryri, gyda phob Warden yn gyfrifol am ardal benodol.
Mae swyddogaeth y Wardeiniaid yn un hynod ddiddorol ac amrywiol, sy’n cynnwys cynghori’r cyhoedd ar ddefnydd diogel a chyfrifol o gefn gwlad, cysylltu gyda pherchnogion a rheolwyr tir i gynorthwyo gyda materion mynediad a rheolaeth ymwelwyr. Maent hefyd yn gweithio gydag ysgolion, colegau a grwpiau cymunedol gyda phrosiectau addysg a chadwraeth.
Wardeiniaid y Parc Cenedlaethol
Gan weithio gyda staff stad a thimau llwybrau, mae’r Wardeiniaid yn cynorthwyo i wneud y Parc Cenedlaethol yn fwy hygyrch i’r cyhoedd trwy ymgymryd â phrosiectau gwella mynediad mewn cydweithrediad â pherchnogion a rheolwyr tir. Mae hyn yn cynnwys gwaith megis ail-wynebu llwybrau, codi camfeydd neu eu cyfnewid am gatiau lle fo’n bosib, codi arwyddion cyfeirio llwybr a gwaith cynnal a chadw cyffredinol.
Trwy eu gwaith, mae’r Wardeiniaid yn dod i adnabod eu hardal yn drylwyr ac maent yn ffynhonnell werthfawr o wybodaeth. Maent hefyd yn wyneb cyfeillgar sydd ar gael i gynnig cyngor ar gyfleoedd hamddena yn eu hardal er mwyn eich helpu i fwynhau profiad diogel a phleserus ym Mharc Cenedlaethol Eryri.
Wardeiniaid Gwirfoddol
O bryd i’w gilydd, bydd cyfle i ddod yn Warden Gwirfoddol yn codi ar gyfer ardaloedd Yr Wyddfa a Chader Idris. Mae’r manteision o ddod yn Warden Gwirfoddol yn cynnwys…
- Cyfle i fod yn rhan o dîm a chwrdd â phobl newydd.
- Gwella eich profiad Mynydda.
- Amrywiaeth o gyrsiau a theithiau cerdded gydag amrywiol arbenigwyr lleol e.e. cymorth cyntaf, hanes lleol, daeareg ardal Yr Wyddfa.
- Profiad gwych all eich cynorthwyo i ganfod cyflogaeth yn y dyfodol.
- Gwella eich gwybodaeth ynghylch rheolaeth cefn gwlad.
- Cyfle i gyfrannu at ddyfodol cynaliadwy Eryri.
I ddysgu mwy am y cyfleoedd gwirfoddoli cyfredol yn Eryri, ewch i’n tudalen gwirfoddoli trwy ddilyn y ddolen isod.
